Diksyonè - Mokreyol

1910 rezilta

Ferari: Yon konpayi machin italyen ki te konnen fè ti machin, kèk fwa, ki pran de moun sèlman.
Fete: Patisipe nan yon fèt. Selebre yon evènman ki te pase nan menm jou sa, pou pi piti, yon ane anvan dat sa a. Selebwe jou yon moun te soti nan vant manman li.
Fevriye: Dezyèm mwa nan yon ane. Sèl mwa nan yon ane ki pote ventsuit ou byen ventnèf jou.
Feyaj: Yon kantite fèy ou byen nenpòt bagay ki gen rapò avèk fèy. Itilizasyon fèy pou medikaman.
Feye: Yon bagay ki gen anpil fèy nan li tankou yon pye bwa.
Fi: Yon femèl moun, yon fanm, yon manman, yon madanm, yon sè, yon kouzin, yon bèlsè. Yon moun ki gen yon koko nan fant janb li.
Fig: Yon bannann, lè li mi, moun kapab manje li san kwit li e li gen bon gou, gou dous. Anpil moun kwè fig bon pou sante moun.
Fikse: Mete yon bagay nan plas li. Ranje yon bagay jan li te dwe ye a, jan li sipoze ye a.
Filaman: Yon ti materyèl andedan yon anpoul elektrik ki fè li bay limyè lè elektrisite pase andedan anpoul la.
Filipin: Yon peyi nan lanmè Pasifik la, an fas chin, ki te pase anpil tan anba diktati yon prezidan tankou peyi Ayiti.
Filyè: De ti kanal ki separe avèk yon ti tras ki sanble avèk fil andedan tou ki andedan yon boulon. Pwent vis gen filyè tou.
Filè: Filè: Yon moun ki ap file, ki konnen file. Yon kadriyaj moun mete sou teren pou jwe volebòl, pingpong avèk tenis.
Fini: Eta yon bagay ki rive nan bout li. Fè tout sa ki te gen pou fèt nan yon travay ki te kòmanse.
Finisman: Dènye moman nan nenpòt bagay. Dènye etap nan yon travay. Dènye pwent nan yon wout, yon distans. Dènye moman anvan yon moun mouri. Dènye jou nan yon gè, nan yon ane.
Fiyansay: Moman, jou, seremoni ki òganize pou de moun ki te renmen e ki ap fiyanse.
Fiyanse: De moun ki renmen, yon gason avèk yon fi, ki deja pran desizyon pou yo marye epi yo reyini tout moun nan antouraj yo pou fè konnen dat maryaj la.
Fizi: Yon zam long avèk dèyè laj ki kapab tire ale lwen.
Fizik: Yon bagay ki gen kò menmsi moun kapab ou byen pa kapab touche. Syans ki etidye kijan tout bagay fonksyone, relasyon yon bagay avèk yon lòt, mouvman bagay, enèjy ki gen nan chak bagay, e latriye. Jan yon bagay fèt.
Fizisyen: Moun ki etidye, fè rechèch, fè eksperyans nan syans fizik la.
Fizye: Tire sou yon moun, yon bagay avèk yon fizi.
Flamab: Eta yon bagay ki limen gwo dife byen vit lè li rankontre avèk yon ti kras dife.
Fleri: Eta yon bagay ki gen flè nan li. Eta yon bagay ki vini bèl. Lè yon moun di fleri, li kapab ap pale de bote yon bagay tou.
Flè: Flè: Yon bèl boujon ki soti nan kèk pye bwa, nan kèk zèb. Yon flè kapab gen yon sèl koulè ou byen plizyè koulè. Yon bagay ki bèl. Flè Disè, Yon zèb nan galèt larivyè ki kapab santi lè yon bagay touche li epi tout fèy li kouche pandan yon bon bout tan. Ouvè-fèmen. Wonte.
Flèch: Flèch: Dènye pwent, pwent ki pi wo a, nan wotè yon bagay. Bal yon zam moun lontan yo te konnen itilize pou touye bèt nan sovaj, nan lagè.
Flèv: Flèv: Yon gwo rivyè ki soti nan yon gwo sous dlo dous. Yon gwo rivyè ki rive fòme paske anpil lòt ti rivyè ale rankontre menm kote pou yo kapab chache chemen lanmè. Yon rivyè laj ki sanble avèk lanmè, men dlo li pa sale. Nan peyi Ayiti, gen Flèv Latibonit ki nan Depatman Sant la ant Mibalè avèk Tomond.
Foli: Yon gwo anvi pou fè, reyalize yon bagay. Eta yon moun ki fou. Pasyon. Yon gwo anvi yon moun genyen pou reyalize, fè yon bagay san reflechi sou konsekans bagay la.
Fon: Kote yon moun kapab pran lajan pou depanse. Yon tou ki rive lwen nan tè. Espas devan tèt yon moun ant cheve li avèk sousi li. Fwon.
Fonksyon: Wòl yon bagay. Rezon ki fè yon bagay egziste. Si pate gen rezon sa a bagay la pate ap bezwen egziste.
Fonn: Soti nan fòm solid pou rive nan fòm likid.
Fonse: Fè yon bagay vini fon. Fè bòdi yon ekriti vini pi nwa ou byen kolore pou atire atansyon moun ki ap li.
Ford: Yon konpayi machin ameriken ki fè machin tankou Taurus, Explorer, Tempo, Escort, e latriye. Premye konpayi machin ki te egziste nan peyi Etazini, depi kòmansman ane 1900 yo.
Fotokopi: Fè yon bagay ki sanble avèk yon lòt bagay yon fason pou li vini difisil pou moun fè diferans ant orijinal la avèk kopi a. Kopi.
Fou: Eta yon moun ki pèdi abilite, bon mwayen pou li panse. Moun sa a pa konnen ki pawòl pou li pale avèk pawòl pou li kenbe sekrè. Eta yon moun ki pa kapab kontwole tèt li. Yon chanm, yon bwat ki kapab kenbe chalè pou boukannen bagay tankou pen, gato, bonbon, e latriye.
Foul: Anpil moun ki reyini ansanm.
Foure: Rantre pwent yon bagay, yon bagay nan yon lòt bagay.
Foutbòl: Foutbòl: Yon jwèt ki gen onz jwè nan chak ekip sou yon teren ki kapab gen san mèt pou longè. Gen yon boul sou teren an chak moun ap eseye mennen nan kan ekip opozan an. Kèk moun kwè jwèt sa a soti nan peyi Angletè.
Fran: Kòb moun sèvi nan peyi Frans.
Frans: Yon peyi nan kontinan Ewòp la ki te posede anpil koloni tankou Ayiti. Anpil koloni yo pran endepandans yo epi Frans vini pèdi pouvwa li nan lemond. Moun nan peyi sa a pale Fransè.
Fransè: Fransè: Lang moun pale nan peyi Frans avèk anpil peyi Frans te kolonize tankou Ayiti. Moun ki fèt nan peyi Frans. Lang sa itilize aksan, apostwòf, atik.
Frape: Leve yon bagay epi lage li sou yon lòt avèk fòs. Dirije yon kò nan direksyon yon lòt avèk fòs jis yo rankontre.
Fredi: Yon gwo chanjman nan tanperati yon zòn kote nivo tanperati a kapab desann pi ba ke zewo degre. Lè gen fredi moun oblije abiye avèk plizyè rad pou kenbe yo cho.
Fri: Eta yon bagay ki bouyi nan lwil. Anpil grenn bwa tankou mango, rezen, zoranj moun kapab manje depi yo rive mi.
Frijidè: Frijidè: Eta yon bagay ki frèt. Yon mak machin ki fè glas e ki rafrechi nenpòt bagay ki andedan li. Anpil moun konfonn mak machin nan avèk machin nan menm: yo rele machin nan frijidè tou. Lè yon likid rete andedan machin sa li fè glas.
Frè: Frè: Yon pitit gason ki gen menm manman ou byen papa avèk yon lòt piti menm moun sa yo.
Frèt: Frèt: Yon branch bwa yon moun itilize pou li frape sou yon lòt moun pou fè kò moun sa a fè li mal. Lè kò yon moun fè li mal, moun nan kriye. Eta moun ki ap viv nan yon zòn ki gen fredi.
Fwomaj: Yon preparasyon lèt ki fè li vini di. Moun manje fwomaj tankou anpil manje solid. Gen kèk fwomaj ki solid anpil, gen kèk ki mou tou e tout soti nan lèt.
Fwon: Espas devan tèt yon èt vivan ki ant je li avèk cheve li, kòn li. Devan tèt yon moun ant cheve li avèk sousi li.
Fwonte: Eta yon moun ki fè yon bagay ki depase laj li. Yon ti gason ki gen de ane konsa mande, nan yon bal, yon granmoun fi ki gen 40 ane konsa pou danse avèk li. Eta yon moun ki renmen eseye fè nenpòt bagay menmsi li pa konnen kisa rezilta ap ye.
Fyèl: Fyèl: Yon ògán andedan vant yon èt vivan ki anmè anpil. Yon bagay ki anmè anpil. Eksperyans yon move moman nan lavi yon moun.
Fè: Fè: Yon eleman chimik. Yon metal ki di anpil. Yon aparèy chofaj moun itilize pou, repare, retire pli sou rad.
Fèb: Fèb: Yon bagay ki pa gen fòs. Fay.
Fèmen: Fèmen: Elimine yon ouvèti. Anpeche yon machin kontinye fonksyone. Etèn.
Fèt: Fèt: Kote yon gwoup moun reyini pou yo pran plezi yo, pou selebre yon okazyon. Yon moman kote tout moun byen abiye, mizik ap jwe, yo ap bwè, yo ap danse. Selebwasyon yon evènman ki te pase nan menm jou sa, pou pi piti, yon ane anvan dat sa. Jou yon moun te soti andedan vant manman li.
Fèy: Fèy: Pati nan yon pye bwa ki parèt apre yon boujon fini soti nan yon pwent nan yon pye bwa. Fèy chak pye bwa gen yon fòm diferan ki depann de pye bwa. Fèy papye, Yon moso papye ki kapab mezire 8 ½ pous nan lajè avèk 11 pous nan longè konsa. Gen anpil lòt dimansyon fèy.
Fòm: Fòm: Premye imaj ki vini nan tèt yon moun lè li tande deskripsyon yon bagay. Yon imaj moun kapab itilize pou fè rekonèt yon bagay. Lè yon gason panse a bèl fanm li wè fòm Coca-cola.
Fòmasyon: chak etap yon bagay pase pou li fòme. Pati ki rantre nan konstitisyon yon bagay. Kijan yon bagay fòme.
Fòme: Fòme: Lè yon fi gen règ li pou premye fwa. Mete plizyè bagay ansanm pou jwenn yon rezilta. Ranje plizyè bagay nenpòt fason pou jwenn yon rezilta.
G: G: Setyèm lèt nan alfabèt lang Kreyòl la ki pwononse menm jan avèk pati nan kò moun ki pèmèt li wè a, je.
Gade: Fikse je sou yon bagay san pyès entansyon. Obsève.
Gadjèt: Yon ti pwent fè nan yo zam moun itilize pou fè yonn, plizyè bal soti nan zam nan.
Gagè: Gagè: Yon plas kote gason ayisyen ale pou fè kòk batay pou yo parye lajan. Gen fi ki ale nan plas sa tou, men yo ale la pou sèvi gason ki a parye yo manje, tafya, e latriye.
Galan: Eta yon gason ki toujou toupre pou sèvi fi avèk entansyon li kapab jwenn yon rekonpans pou sèvis li.
Galita: Yon espas sou anlè galri yon kay kote moun kapab rantre andedan li lè moun nan deja andedan kay la. Pa gen mwayen pou rantre andedan galita a soti sou deyò.
Galri: Yon espas nan yon kay kote moun ki ap viv nan kay la kapab chita pou pran bon van e respire bon lè. Espas sa a toujou bay sou lari e anba galita a.
Galèt: Galèt: Wòch sou kote yon rivyè ki byen ranje tankou moun te pran tan pou ranje yo, men se rivyè a menm ki pote yo mete nan plas sa pandan li ap desann.
Ganmèl: Yon gwo twons bwa ki gen yon tou rektang tankou yon bwat san kouvèti andedan li. Li kapab kenbe likid. Se peyizan ayisyen ki itilize li plis.
Gason: Premye moun Bondye te mete sou tè a anvan li te fè fi. Yon moun ki gen yon zozo nan fant janb li. Mari yon fi, papa yon moun, e latriye. Yon mal moun.
Gaz: Yon pwodui chimik moun ki oblije fèmen andedan yon tank pou li pa evapore nan lè. Yon likid ki kapab vini envizib menm jan avèk oksijèn. Moun itilize gaz nan machin, avyon, fou, e latriye.
Gazon: Yon kalite zèb moun prepare pou fè devan yon kay, lakou yon kay bèl.
Gazèl: Gazèl: Yon ti femèl bèf ki poko fè pitit.
Ge: Eta yon moun, yon timoun, ki toujou ap jwe, ki toujou anvi jwe.
Gen: Eta yon bagay ki anba kontwòl ou byen ki se pwopriyete yon moun, yon bagay ki fè pati de yon lòt.
Genyen: Sitiyasyon yon moun ki vini mèt, ki gen yon bagay. Pran premye plas nan yon jwèt, yon kous, e latriye.
Gete: Eta yon moun, yon timoun ki ge. Nenpòt kadans yon moun genyen ki fè li sanble yon moun ki ge, ki kontan.
Gildiv: Yon izin nan peyi Ayiti kote yo fè kleren.
Ginen: Guinee. Yon mwayen pou di yon bagay lwen menm jan avèk esklav nwa yo ki te konnen soti nan Ginen, sou kontinan Afrik la pou ale Ayiti. Nenpòt bagay ki lwen anpil. Yon peyi nan kontinan afriken an kote anpil esklav nwa te soti.
Gita: Yon enstriman mizikal ki gen sis kòd e mizisyen jwe li avèk prèske tou dis dwèt yo.
Giyon: Yon bagay, yon moun, ki fè lavi yon lòt moun difisil. Yon moun, yon bagay ki anmèdan.
Giyonnen: Aksyon yon giyon. Bay yon blag sou yon moun, di yon moun bagay li pa renmen tande.
Glas: Yon moso materyèl, lè moun gade li, moun nan kapab wè figi li avèk tout bagay ki an fas materyèl sa. Yon dlo moun mete nan frizè yon refrijeratè epi ki vini di tankou yon wòch. Glas gen yon koulè gri ou byen blan. chalè kapab fonn glas.
Glase: Eta yon bagay ki gen glas nan li. Yon bagay ki frèt anpil tankou glas.
GMC: (General Motor Company) Yon konpayi machin ameriken ki fè gwo kamyon avèk kèk ti machin tou.
Gode: Yon resipyan ki fèt pou moun bwè likid tankou dlo, kafe, e latriye.
Gonayiv: Pi gwo vil nan Depatman Latibonit la. Se yonn nan pi ansyen vil nan peyi Ayiti. Se nan vil sa fondatè peyi a te fè seremoni endepandans Ayiti. Vil sa plase nan mitan lwès peyi Ayiti.
Gonbo: Non moun nan kèk zòn peyi Ayiti bay grenn glise yon ti pye bwa donnen. Kalalou. Moun fè bon sòs avèk grenn sa a.
Gou: Opinyon yon moun genyen de yon bagay ki andedan bouch li.
Goud: San santim, san kòb nan lajan ayisyen an. Senk goud fè yon dola.
Gouman: Yon moun ki toujou vle manje e ki pa janm santi lè vant li plen. Yon moun ki renmen manje. Anpil timoun gen abitid sa a; kidonk se granmoun yo ki fèt pou kontwole kantite manje ki ap ale nan vant yo.
Goumandiz: Eta yon èt vivan ki manje san kontwole kantite manje ki ap rantre nan vant li.
Gous: Fri anpil plant tankou pwa ki donnen yon grenn ki sanble avèk yon ti baton e ki gen, soti nan twa pou rive nan dis, grenn andedan li.
Gout: Yon ti pati nan yon likid ki ap soti anlè pou tonbe anba. Lapli tonbe an gout sou tè a.
Goute: Mete yon bagay nan bouch pou konpare gou li avèk lòt gou.
Gouvènman: Gouvènman: Yon prezidan avèk tout moun ki ap ede li gouvène you peyi. Yon gwoup moun ki gen pouvwa pou gouvène. Yon moun, gwoup moun, ki ap gouvène yon teritwa.
Gouvènmantal: Gouvènmantal: Tout bagay ki gen rapò avèk yon gouvènman.
Gouyad: Yon fason moun ki ap danse, fè sèks vire ren yo. Moun sa yo gen entansyon vire ren yo pou fè yon wonn san rete, pandan yon kantite tan.
Gouye: Vire ren nan fòm yon wonn.
Goyin: Yon zouti ki gen anpil dan sou liy nan yon kwen li e ebenis itilize li. Moun itilize goyin pou koupe planch.
Gra: Gwo. Posede yon gwosè ki fè panse gen anpil grès nan vyann yon kò. Eta yon bagay ki gen lwil nan li.
Gradyasyon: Yon seremoni reponsab lekòl yo òganize pou fè etidyan yo sonje valè travay yo soti akonpli a e bay yo yon diplòm ki reprezante nivo etid yo fè a.
Gradye: Patisipe nan yon seremoni gradyasyon.
Graj: Yon moso metal ki gen anpil ti tou sou tout lajè li; konsa nenpòt bagay ki pi mou pase metal sa a e ki pase sou li li ap travèse ti tou yo. chak pase yon bagay pase sou graj la, li retire nan kò bagay sa pou diminye gwosè li.
Graje: Jès yon moun fè lè li anvi leve sou yon chèz kote li chita, men gen yon bagay, tankou yon otorite, ki anpeche li leve. Fwote yon moso bagay sou yon graj pou jis li vini twò piti pou fwote sou graj la.
Gramè: Gramè: Yon liv ki esplike tou règ avèk prensip pou moun respekte nan yon lang.
Gran: Yon bagay, yon moun ki gen anpil ane depi li te kòmanse egziste. Yon bagay ki laj, ki wo, ki aje. Gran Papa, Papa manman ou byen papa papa yon lòt moun. Mari yon grann. Gran papa yo toujou gran.
Grandi: Eta yon bagay, yon moun ki ap pase etap li gen pou li pase pou li vini wo.
Grandizè: Moun ki pale anpil yon fason pou chache bay tèt li plis bon kalite, bonte, valè, grandè li pa genyen avèk espwa lòt moun ap bay li menm bagay sa yo tou.
Grandè: Grandè: Kapasite yon moun genyen pou li fè nenpòt moun respekte li, pè li. Kalite ki ede yon moun dirije yon gwoup moun, yon kò militè nan lagè e genyen gè a. Kalite yon moun posede pou li dirije lòt moun.
Grangou: Eta yon moun santi li lè li anvi manje. Egzitans yon vid nan lestomak yon èt vivan. Jan yon moun santi li chak twa èd tan apre li fini manje.
Granmesi: Avèk sekou… Avèk èd…
Granmoun: Nenpòt moun ki, fè pitit, rive nan laj lè li te dwe deja fè pitit. Yon moun ki gen anpil ane an plis yon lòt.
Grann: Yon granmoun fi ki manman manman ou byen manman papa yon lòt moun. Madanm yon gran-papa a. Grann Nanna, Yon granmoun fi ki gen yon mennaj, yon mari ki te kapab pitit li pou gwo diferans ant laj yo de a.
Grannivyè: Yon vil nan Depatman Nò a. Grande Rivière du Nord.
Granvensan: Yon bannann moun kapab manje lè li vèt ou byen lè li mi. Lè li mi yo rele li fig.
Grap: Grenn yon pye palmis ki soti andedan djagwasil yo. Kochon nwa yo te konnen manje grap paske li dous. Grenn sa a te konnen angrese bèt sa tou.
Gravite: Yon fòs ki rale tout kò ki toupre fas tè a tonbe sou li. Syantis mezire fòs sa e yo jwenn li rale tout kò tonbe sou tè a avèk yon vitès ki mezire 9,8 mèt pou chak segond ki pase lè yon bagay ap tonbe.
Grenadya: Yon lyann ki kapab pase plizyè ane ap grandi pandan li ap donnen anpil grenn prèske chak jou. Fri grenadya a sanble avèk yon ti boul. Li gen yon ji andedan li ki si anpil avèk kèk ti grenn tou. Li fè bon ji e ayisyen renmen bwè ji sa a anpil.
Grenn: Fri yon pye bwa ki pèmèt pye bwa a kontinye egziste. Grenn yon pye bwa gen yon ti grenn andedan li. chak ti grenn sa yo kapab bay yon pye bwa pou kont yo lè yo gèmen, men gen anpil grenn pye bwa ki pa gèmen.
Grip: Yon maladi kontajye yon mikwòb bay. Moun ki gen grip toujou santi yon bagay nan gòj yo ki fòse yo ouvri bouch yo pou pouse yon kouch lè soti. Kèk fwa malad la kòmanse anrime anvan li gen grip. Lè yon moun gen yon grip ki dire anpil tan li fèt pou li ale wè yon doktè pou konsiltasyon.
Gripe: Eta yon moun ki soufri maladi ki rele grip.
Griye: Kwit yon bagay avèk chalè dife e san dlo. Yon bagay ki ap griye gen kontak dirèk avèk dife a.
Grèk: Grèk: Yon ti sak ki gen fòm yon triyang e ayisyen itilize li pou yo koule, fè kafe. Yon lang moun pale nan peyi Grès. Moun ki fèt nan peyi Grès.
Gwatemala: Yon peyi sou kontinan Amerik la nan yon zòn ki rele Amerik Santral, nan Sid Meksik. Moun nan peyi sa pale Espanyòl.
Gwayamouk: Mo sa a soti nan lang Espanyòl la: guayamunco. Se yon rivyè ki pase sou kote kapital Depatman Sant la, Ench. Gen de rivyè enpòtan ki tonbe nan Gwayamouk, Yofri avèk Kanno epi yo tout ale tonbe nan flèv Latibonit la.
Gwayav: Yon pye bwa ki bay yon fri won, ki fè bon konfiti, bon ji.
Gwo: Yon dimansyon laj. Eta yon moun ki gen anpil popilarite. Près. Anpil. Yon fason machann vann machandiz yo genyen pou fè pri inite yo vini pi piti.
Gwonde: Fè yon bri andedan gòj pou entimide lòt moun, bèt. Yon bri chyen fè anvan yo kòmanse jape. Bri yon loray fè e ki dire plizyè segond.
Gwoswòch: Yon plaj nan Depatman Latibonit nan Nò Sen-Mak.
Gwosè: Gwosè: Dimansyon egzat yon bagay genyen.
Gwosès: Gwosès: Moman lè yon fi ap pote yon pitit andedan vant li. Yon fi pote yon pitit andedan vant li pandan nèf mwa. Plenn.
Gwoup: Plizyè an menm tan. Rasanbleman, reyinyon plizyè moun.
Gwòs: Gwòs: Rezilta yon spèmatozoyid ki rankontre avèk yon ovil andedan yon fi, yon femèl. Rankont sa bay yon ze ki ap ale bay yon timoun, yon ti bèt. Devlopman yon timoun dire nèf mwa, pou yon fi, anvan li akouche.
Gèmen: Gèmen: Moman lè yon grenn kòmanse grandi.
Gòl: Gòl: choute, voye yon boul rantre nan kan yon lòt ekip.
H: H: Uityèm lèt nan alfabèt lang Kreyòl la.
Harley Davidson: Harley Davidson: Yonn nan de pi ansyen konpayi motosiklèt, sou kote Honda, ki te kòmanse fè motosiklèt nan kòmansman ane 1900 yo. Yon konpayi motosiklèt ameriken.
Honda: Yon konpayi motosiklèt japonès. Li kòmanse fè motosiklèt nan peyi Japan epi li rantre nan peyi Etazini nan ane 1950 yo. Se yonn nan de pi ansyen konpayi motosiklèt yo ki te kòmanse fè motosiklèt nan kòmansman ane 1900 yo. Tout kote Honda pase, li elimine konpetisyon Harley Davidson.
Hyundai: Yon konpayi machin Koreyen. Konpayi sa a fè ti machin, tankou konpayi Japonè yo, e machin sa yo pa vann chè.
I: I: Nevyèm lèt nan alfabèt lang Kreyòl la.
Idantifikasyon: Yon mwayen pou rekonèt yon bagay, yon moun. Yon ti kat ki gen non yon moun avèk foto moun nan sou li pou lye non an avèk foto a.
Ideyal: Yon bagay ki egzateman nan pozisyon li, plas li te dwe ye a. Yon bagay ki sanble anpil avèk yon lide ki te nan tèt yon moun.
Il: Lil. Yon moso tè dlo antoure, dlo pase sou tout kwen li.
Iletre: Eta yon moun ki pa konnen li avèk ekri. Yon moun ki pa konprann anpil bagay nan reyalite lavi.
Imaj: Kopi yon bagay. Lonbraj yon bagay.
Imajine: Kreye imaj yon bagay, yon lide nan tèt anvan li vini egziste nan reyalite.
Imigran: Moun ki kite peyi yo pou vini viv nan yon peyi etranje.
Imigrasyon: Aksyon moun ki kite yon peyi yo pou vini viv nan yon lòt peyi. Biwo leta yon peyi ki regle afè moun ki ap rantre epi soti nan peyi a.
Imigre: Kite yon peyi pou vini viv nan yon lòt peyi.
Imitasyon: Aksyon yon moun ki gade kijan yon lòt moun fè yon bagay pou fè li tou. Kèk fwa yon imitasyon tèlman sanble avèk orijinal la moun pa kapab konnen diferans ant yo de a. Kopi.
Imite: Gade yon bagay, sa, yon moun fè pou fè menm bagay la tou. Kopye.
Imobilize: Tache ou byen kole yon bagay yon kote byen solid pou li pa kapab souke, deplase ditou.
Infiniti: Yon konpayi machin liksye, sou kote Mercedes avèk Lexus.
Inifòm: Inifòm: Plisyè bagay ki gen menm fòm nan. Yon rad menm koulè, menm fòm nan plisyè moun nan yon gwoup tankou yon enstitisyon, yon ekip mete sou yo.
Inik: Yon bagay ki diferan de tout lòt nan menm klas la.
Inivè: Tout bagay ki egziste depi soti sou tè a pase sou tout lòt planèt yo: Solèy, Lalin, Jipitè, e latriye.
Inivèsite: Inivèsite: Yon gwoup enstitisyon, apre lekòl segondè, ki prepare pwofesyonèl.
Inosan: Yon moun ki pa konnen kijan pou li defann tèt li. Yon moun, malgre tout akizasyon, yon tribinal pran desizyon pou li pa kondane moun li. Moun ki genyen yon jijman.
Inyon: De ou byen plizyè moun, plizyè bagay ki reyini ansanm. Inyon Sovyetik, Yon gwoup peyi, avèk peyi Risi nan tèt yo, ki te ap pousib yon lide ki te rele Kominis. Se te yon gwoup peyi ki te ap kontrekare lide Kapitalis la nan peyi Etazini. Inyon an kraze nan kòmansman ane 1990 yo. Prèske tout peyi sa yo gen lide pou ranje so kote lide Kapitalis la.
Ipokrit: Moun ki kache rayisman avèk vye lide yo gen kont yon lòt moun, lè yo devan moun nan, pou montre yo se yon zanmi li, yo renmen li. Lè yo dèyè menm moun sa a, yo eksprime tout vrè santiman yo kont moun nan.
Ipokrizi: Aksyon moun ki kache rayisman avèk vye lide yo gen kont yon lòt moun, lè yo devan moun nan, pou montre yo se yon zanmi li, yo renmen li. Lè yo dèyè menm moun sa a, yo eksprime tout vrè santiman yo de moun nan.
Irak: Yon peyi nan kontinan Azi a e sou kote Iran, pi gwo énmi peyi sa tou, ki pa lye avèk Etazini, ki pate lye avèk Inyon-Sovyetik.
Iran: Yon peyi nan kontinan Azi a e sou kote Irak, pi gwo énmi peyi sa tou, ki pa lye avèk Etazini, ki pate lye avèk Inyon-Sovyetik.
Istoryen: Moun ki ekri sou istwa, tout sa ki pase deja e avèti moun: sa ki pase deja ap retounen ankò.
Istwa: Nenpòt bagay ki pase deja e moun kontinye ap pale ou byen ekri sou li. Moun ki ap rakonte yon istwa kòmanse avèk yon entwodiksyon, yon devlopman, e fini avèk yon konklizyon.
Isuzu: Yon konpayi machin Japonè ki te plis konn fè kamyon.
Italik: Nenpòt bagay ki gen rapò avèk peyi Itali. Fòm lèt, nan yon ekriti, ki panche.
Itilizatè: Moun ki itilize yon bagay ou byen yon lòt moun.
Itilize: Pran yon bagay an chaj epi kontwole. Pran avantaj sou yon bagay, yon moun.
Izin: Kèk gwo kay kote travayè itilize machin pou transfòme pwodui natirèl yo tankou bwa pou fè papye, gonm pye bwa pou fè wou machin, lèt bèf pou fè twal, e latriye.
J: J: Dizyèm lèt nan alfabèt lang Kreyòl la ki pwononse menm jan avèk bwason sa a, ji.
Jaden: Yon moso tè, yonn ou byen plizyè kawo tè kote yon jadinye plante, sekle, rekòlte.
Jakmèl: Jakmèl: Kapital Depatman Sid Lès la.
Janb: Tout longè pye yon moun depi soti bò senti li pou jis rive anba plat pye.
Janbe: Itilize janb pou soti sou yon bò yon bagay, yon moun pou travèse ale sou lòt bò bagay la, moun nan. Yon ekspresyon moun itilize pou esplike kijan yo travèse yon bagay.
Jant: Yon moso metal won ki gen menm fòm avèk yon kawoutchou e ki rantre andedan yon kawoutchou pou pèmèt kawoutchou a kenbe van. Prèske tout veyikil tankou bisiklèt, motosiklèt, machin gen jant.
Jante: Mete yon jant andedan yon kawoutchou.
Janvye: Premye mwa nan yon ane ki pote trante-en jou. Yon ane chanje lè premye jou nan mwa janvye a rive.
Japan: Yon peyi nan kontinan Azi a ki chita sou plizyè ti il. Peyi sa trè avanse nan konesans teknoloji.
Jape: Yon bri chyen fè avèk bouch li ouvri, lè li bezwen fè moun pè, lè li pè.
Je: Pati nan kò moun, nan tèt moun, ki pèmèt moun wè. Yon mesaje ki pote rapò bay chèf li, se je chèf la paske li pèmèt chèf la wè sa ki ap pase. Yon kamera se je moun tou.
Jedi: Senkyèm jou nan yon semèn. Katriyèm jou biznis nan yon semèn.
Jedinèt: Yon bannann pote non sa a nan zòn Depatman Sant la. Lè li vèt li rele jedinèt, lè li mi li rele fig. Gen menm bannann sa a nan prèske tout zòn nan peyi a, li kapab gen lòt non tankou granvensan.
Jeep: Yonn nan pi ansyen konpayi machin ki egziste. Yon ansyen modèl machin konpayi sa, Willis, toujou egziste. Jeep fè mak machin Cheroke tou.
Jeneral: Pi gwo grad yon moun kapab genyen nan yon kò militè. An Jeneral , Pale de yon bagay tout antye san panse a eksepsyon li.
Jenerasyon: Moun ki ap viv nan yon epòk ki dire dizuit ane konsa. Moun nan tout sosyete espere apre dizuit ane tout timoun nan tout fanmiy ap gentan fè pitit. Tout pitit, pitit pitit granmoun nan yon fanmiy. Nouvèl Jenerasyon, Yon tip mizik ayisyen ki parèt nan ane katreven yo. Gwoup ki fè mizik sa yo chante an Kreyòl yon fason pou separe nouvo stil mizik yo a avèk ansyen mzik yo chantè te konnen chante nan lang Fransè.
Jeni: Lespri moun genyen pou kreye bagay. Nan tan lontan, moun te panse jeni se te yon fòs djab ki te ap ede moun. Konnye a moun ale lekòl pou yo kapab kreye bagay.
Jennen: Eta yon moun ki wont, timid. Eta yon moun ki vòlè yon bagay epi mèt bagay la kenbe li.
Jenou: Espas ant pye avèk kuis moun ki gen yon ti boul nan li pou pèmèt janb nan pliye sou dèyè.
Jeograf: Moun ki etidye epi entèprete enfòmasyon geografik.
Jeografi: Syans ki pale, mezire fas tè a, de moun ki sou tè a.
Jeremi: Non yon pwofèt nan Bib la. Jeremie. Non kapital Depatman Grandans la. Vil sa a sou yon prèskil nan Sid-Lwès peyi Ayiti e se zòn nan peyi ki gen plis lamveritab.
Jezi Kris: Yon pitit Bondye ki te vini sou tè a pou mouri nan plas tout lòt moun sou tè a pou efase peche yo. Li te viv pandan trant-twa ane sou tè a. Tout kretyen kwè li nan syèl la konnye a e li chita sou bò dwat papa a, Bondye.
Ji: Yon bwason ki fèt avèk fri yon pye bwa. Pou fè yon ji, moun pran fri a epi yo kraze ou byen peze li pou likid soti andedan li epi yo mete dlo sou likid sa anvan yo sikre li.
Jij: chèf yon tribinal ki la pou koute de kan nan yon jijman e kontwole tout sa ki ap pase nan yon tribinal.
Jijman: Moman nan yon tribinal kote gen yon jij, yon jiri, yon plentif ou byen yon pwosekitè, yon defandan, yon okton. Konklizyon travay tout moun ki reyini nan yon tribinal.
Jistis: Sib tout entansyon lwa yo nan yon jijman. Jwenn satisfaksyon nan tribinal kont move aksyon, aksyon kriminèl yon moun komèt.
Jiyè: Setyèm mwa nan yon ane. Yonn nan de mwa ki fè plis chalè nan yon ane sou kote mwa Out la.
Jodia: Konnye a menm, nan menm jou sa a. Nan moman sa a menm.
Jon: Yon baton avèk de pwent remakab yon pwofesyonèl kapab vire tou won sou men li, dwèt li, kou li, menm pye li san baton an pa janm tonbe yon kote li pate vle. Pwofesyonèl sa a rele Majò Jon. Majò Jon plis patisipe nan Rara.
Jèmen: Jèmen: Lè yon grenn kòmanse grandi.
Jèn: Jèn: Yon laj moun genyen kote yo gen tout enèji, fòs sou yo pou fè anpil bagay ki egzije fòs moun tankou kouri, memorize, pale, e latriye… Jèn Jan Yon gason ki nan laj moun ki posede tout enèji, fòs pou fè anpil bagay ki egzije fòs moun tankou kouri e latriye.