Diksyonè Kreyòl.

1 910 mo nan diksyonè a

Entènèt

Entènèt: Yon mwayen kominikasyon ki pèmèt tout moun ki posede yon òdinatè avèk yon liy telefòn kominike ant yo. Pou kominike nan fason sa a, moun ablije achte sèvis nan men yon konpayi ki vann sèvis sa a e yo kapab kominike avèk nenpòt moun nan nenpòt peyi. Yon revolisyon nan mwayen moun kominike yonn avèk lòt. Gen plisyè mwayen moun kominike sou entènèt la. 1) Yo kapab voye yon lèt nan adrès lèt (e-mail=lèt elektwonik) moun yo vle ekri a. Lèt sa a ale dirèkteman nan yon gwo òdinatè kote destinatè a kapab itilize òdinatè pa li pou li lèt la. 2) Moun kapab ekri sa yo vle di a epi peze yon bouton pou yon moun wè mesaj la menm lè a (chat). Anpil lòt moun kapab wè mesaj sa a. 3) Yon moun kapab pale avèk yon lòt moun pandan yo tou de chita devan òdinatè yo. 4) Dènye mwayen an gen lèt elektwonik nan li tou, men li ti kras diferan. Yon moun, yon konpayi gen yon adrès (Home Page = Paj Kay) kote lòt moun kapab kite mesaj pou li e se mèt paj sa a sèlman ki kapab wè li. Anpil biznis itilize mwayen sa a pou fè biznis, gwo biznis.

Enterè

Enterè: Kòb yon moun peye an plis sou yon lajan li te lwe, prete nan men yon lòt moun. Kantite dwa pou resevwa pwofit yon envestisè genyen nan yon biznis de ou byen plizyè moun posede ansanm.

Enterese

Panchan, enterè yon moun montre li genyen nan yon bagay.

Entèwogasyon

Fraz ki kòmanse avèk mo tankou kisa, ki, kiyès, poukisa, èske, e latriye. ?. Tout kesyon gen siy sa (?) nan finisman yo pou montre yo se yon kesyon.

Entim

Konesans, bagay yon sèl moun konnen de kò li tankou yon fi konnen koko li, yon gason konnnen zozo. Relasyon Entim, Relasyon yon fi avèk yon gason genyen kote yonn konnen anpil sekrè nan lavi lòt la. Yo tou de a konnen wè e manyen tout pati nan kò lòt la.

Entwodiksyon

Premye nan twa pati yon redaksyon, yon disètasyon ki anonse odyans elèv la de kisa li ap ale pale nan devlopman an. Prezante yon moun devan yon lòt moun.

Envestige

Revize, sib travay yon moun fini fè pou wè si travay la byen fèt. chache konnen ki moun ki fè yon krim pou arete moun nan.

Envizib

Eta yon bagay je pa kapab wè. Disparèt. Eta yon bagay ki menm koulè avèk lè.

Epesè

Wotè yon bagay ki gen twa kwen tankou yon wonn ou byen sis kwen tankou yon bwat.

Epi

Yon mo, lè li nan mitan de lòt mo fè konprann gen de aksyon ki ap egzekite yonn apre lòt la. Yon moun ap manje epi grangou li ap pase.

Epis

Zèb moun itilize pou bay manje bon gou. Se yonn nan zèb ki pi ansyen sou tè a.

Ès

Lès. Yonn nan kat pwen kadinal yo ki nan direksyon kote solèy la leve a chak maten. Avanse nan yon direksyon, men pa janm rete sou yon liy dwat.

Esklav

Moun nan ras nwa a moun nan ras blan yo te konnen ale chache sou kontinan afriken an pou fè yo vini travay di e gratis sou plantasyon nan koloni yo. Kèk santèn ane anvan blan yo te rantre nan tranzaksyon esklavaj sa a, nwa nan yo te konnen gen esklav blan tou.

Esoufle

Eta yon moun ki bouke anpil e li pa kapab respire nòmalman. Yon moun ki ap fè egzèsis kapab santi li esoufle e gen plizyè maladi tankou las, tansyon-wo ki kapab fè yon moun santi li esoufle tou.

Espas

Distans ki ant planèt yo: Jipitè, Venis, Plito, Tè, e latriye. Distans ant de bagay. Nenpòt kote ki gen lè e yon bagay kapab jwenn plas.

Espri

Lespri. Fòs envizib ki kapab aji sou bagay ki vizib. Bondye. Satan.

Estasyon

Plas kote yon bagay ye. Kote bagay tankou yon machin, yon tren kanpe pou pran pasaje, pou moun jwenn yo lè gen bezwen.

Estasyone

Kanpe nan yon estasyon. Eta yon machin ki kanpe nan yon estasyon pou pasaje monte li. Eta nenpòt bagay ki kanpe yon kote.

Estidyo

Yon konpayi ki regle afè anrejistre mizik, sinema. Yon konpayi radyo ou byen televizyon. Yon biznis kote fi ale pou yon fè cheve yo, zong yo, figi yo bèl. Yon salon bote.

Eta

Yon peyi endepan ki gen yon gouvènman avèk chèf tankou yon prezidan ap dirije li. Jan yon bagay ye: sante, karaktè, kalite li. Leta.

Etazini

Peyi sa a nan Amerik Nò a e li nan ant Kanada avèk Meksik. Li gen senkant eta nan li; se sa ki fè li rele Eta-z-ini. Lang ofisyèl peyi sa se anglè, men kantite imigrant ki ap viv nan peyi a fè gen diferan moun ki pale tout lang ki gen nan lemond nan li. Pi gwo peyi, pi gwo fòs politik, ekonomik e komèsyal nan lemond. Kapital peyi sa rele Wachington, pou pote non fondatè li: George Wachington.

Etèn

Etèn: Elimine kapasite yon bagay pou li kontinye jwe yon wòl tankou limyè, dife ki ap klere. Koupe sous enèji ki pèmèt yon machin mache. Retire lavi yon moun, yon bèt.

Etènèl

Etènèl: Yon bagay ki ap toujou egziste pou tout tan. Gen de bagay ki ap toujou la pou tout tan: Bondye, Satan.

Etid

Rechèch pou mete konesans nan yon sèvo. chache konnen yon bagay, konstitisyon yon bagay. Konesans nan yon disiplin, yon syans.

Etidyan

Moun ki fè rechèch pou mete konesans nan sèvo yo. Moun ki chache konnen yon bagay, konstitisyon yon bagay, konesans nan yon disiplin.

Etidye

Mete konesans nan yon sèvo. Aksyon yon moun ki ap chache konnen yon bagay, yon disiplin, konstitisyon yon bagay, konesans nan yon disiplin.

Etikèt

Etikèt: Valè ki kapab rete avèk moun nenpòt ki kote moun pase. Yon non tout moun konnen pou yon pwodui, yon biznis. Yon ti moso papye ki reprezante imaj yon konpayi, yon òganizasyon.

Etónman

Yon bagay ki rive san espwa ke li te ap ale rive. Sipriz.

Etyoupi

Yon peyi sou kontinan afriken an moun te toujou konsidere tankou peyi ki pi pòv sou tè a. Povrete te tèlman grav tout moun nan lemond te konnen ap pale de mizè pèp ki ap viv nan peyi sa.

Evolisyon

Etap yon bagay ki ap evolye pase. Aranjman nan mès, koutim yon pèp, yon sosyete, yon epòk, yon ras, e latriye. Yon eksplikasyon sou aparisyon moun sou tè a pou fè tout moun konprann Bondye pate kreye moun, men moun te evolye; sa vle di moun te pase anpil etap anvan yon te vini moun.

Evolye

Pase soti nan yon etap pou rive nan yon lòt etap moun konsidere ki pi bon, pi rafine. Kite yon pèsonalite, karaktè ki sanble avèk eta bèt ap viv.

Ewòp

Yonn nan senk kontinan yo ki gen peyi tankou Almay, Frans, Bèljik, Angletè nan li. Kontinan sa a kole avèk kontinan Azi a; sa fè kèk moun di pa gen yon kontinan ki rele Ewòp tout bon vre.

Èzili

Non yon femèl lwa nan vodou ayisyen.

F

F: Sizyèm lèt nan alfabèt lang Kreyòl la.

Fa

Yonn nan sèt nòt mizikal yo: do, re, mi, fa, sòl, la, si.

Fache

Move. Eta yon moun ki pa kontan. Eta yon moun ki pa kapab jwenn bagay li bezwen e ki pa vle satisfè avèk sa li genyen.

Faks

Yon moso papye avèk ekriti sou li ki soti kote yon moun itilize yon machin ki kapab kominike avèk yon lòt machin pou voye tèks nan machin sa a. Faks machin, Yon machin ki kapab itilize yon liy telefòn pou voye mesaj bay lòt machin. Yon aparèy elektwonik ki andedan yon òdinatè e ki mete ansanm avèk yon pwogram pou voye mesaj bay anpil lòt machin.

Falèz

Falèz: Yon tou sou kote yon wout tankou anba yon mòn.

Famasi

Yon boutik kote ki gen medikaman pou vann pou tout maladi.

Fanm

Femèl e manman. Depre Bib la, fanm se yon moun Bondye te fè avèk yon zo kòt Adan pou kapab kenbe gason konpayen. Yon fanm fèt pou li toujou gen cheve long, gwo ou byen tete long, gwo dèyè avèk koko nan fant janb li. Yon fi kapab mete zanno nan zòrèy li, wòb sou li, e latriye. Li gen règ chak mwa.

Fanmòt

Yon fanm ki pa gen tay nòmal yon moun sipoze genyen. Yon ti fi.

Fann

Koupe yon bagay nan direksyon longè li.

Fant

Espas ant de bagay, nan mitan de bagay.

Fantastik

Yon bèl bagay pyès moun pa kapab meprize bote. Yon bagay ki bèl anpil.

Farin

Poud. Yon poud ki soti nan fri kèk pye bwa tankou bannann, manyòk. Poud ble. Farin frans, Yon farin blan ayisyen itilize pou fè anpil manje tankou labouyi, bòy e latriye.

Farinay

Anpil ti moso nan nenpòt bagay. Yon lapli ki ap tonbe tou piti san li pa janm bay anpil, gwo gout lapli.

Farinen

Aksyon yon lapli ki ap tonbe tou piti san li pa janm bay anpil, gwo gout lapli yon sèl kou. Aksyon yon moun ki kite krache soti nan bouch li pandan li ap pale.

Fatra

Bagay ki san valè. Tout bagay moun pa gen bezwen pou li.

Favè

Favè: Yon sèvis yon moun rann yon lòt men moun nan pa merite sèvis la.

Fay

Bagay ki pa gen fòs ditou e nenpòt ti van kapab leve li epi pote li ale depoze yon lòt kote. Feblès. Fèb.