Diksyonè Kreyòl.

1 910 mo nan diksyonè a

Nèf

Nèf: Dizyèm chif nan nonb pozitif yo. Kat plis senk. Yuit plis en. 9. Yon bagay ki apèn fini fèt e moun poko janm itilize.

Nèg

Nèg: Tout moun koulè nwa yo. Moun sa yo te premye parèt sou kontinan afriken an, gen moun nwa nan tout peyi sou tè a konnye a.

Negatif

Yonn nan de pòl elektrisite yo (avèk pozitif) kote kouran rantre nan sous elektrisite a ankò. Yon siy mwens operasyon (-) ki montre gen yon kantite ki ap ale soti nan yon lòt kantite.

Nègès

Nègès: Yon jèn fi ki gen anpil enèji nan kò li. Vrè laj pou rele yon fi nègès, pou mojorite fi, se sèz ane. Wanga Nègès, Yon ti zwazo ki gen bèk long e ki toujou ap manje polèn nan flè ki apèn ouvri.

Nèj

Nèj: Yon poud blan ki soti nan espas e ki tonbe sou tè a nan peyi ki fè frèt anpil yo. Pou nèj tonbe, tanperati a oblije rete pi wo ke zewo degre Celcius (0ºC) ou byen trant-de degre Fareinheit (32ºF). Lè nèj tonbe sou yon bagay tanperati li pi wo pase 0ºC, li fonn pou bay dlo; kidonk anpil nèj kapab bay anpil dlo. Dlo nèj la ap transfòme an glas si wotè tanperati nan zòn nan pa janm monte. Se sa ki fè moun nan peyi fredi yo konnen oblije mache sou glas nan sezon ivè.

Nen

Yon pati nan figi moun ki ant de je yo avèk bouch la e ki gen de tou nan li pou pèmèt respirasyon fèt san pwoblèm. Krèt. Pati devan yon machin e devan anpil lòt bagay tou.

Nesesè

Nesesè: Yon bagay ki oblije egziste pou yon lòt bagay fèt. Yon bagay moun pa kapab viv san li tankou lè.

Nesesite

Eta yon bagay ki nesesè. Eta yon bagay ki oblije egziste pou yon lòt bagay kapab egziste, pase, rive, pou yon kondisyon akonpli. Eta yon bagay ki gen twòp enpòtans.

Netwayaj

Aksyon yon moun pou fè yon bagay, yon kote vini pwòp. Netwaye yon bagay, yon kote.

Netwaye

Fè yon kote vini pwòp. Retire tout bagay ki sal, ki fè yon kote sanble avèk bagay sal. Mete pwoprete nan yon bagay, yon kote.

New York

New York: Kapital komèsyal peyi Etazini. Pi gwo vil nan yonn nan senkant divizyon nan peyi Etazini an ki pote menm non avèk divizyon sa a. Kapital politik leta New York se Albany.

Nikaragwa

Yon peyi nan kontinan Amerik la e nan Amerik Santral kote moun yo pale Espanyòl. Kapital peyi sa se Managwa.

Nissan

Yon konpayi machin Japonè ki fè ti machin, mwayèn machin e gwo machin.

Nò

Nò: Yonn nan kat direksyon kadinal yon ki pèpandikilè a lès avèk lwès. Si yon moun ap ale nan direksyon nò, lès sou bò dwat li e lwès sou bò goch li; konsa sid dèyè li.

Nòmal

Nòmal: Jan tout moun espere yon bagay, yon moun dwe ye.

Nòmalize

Mete yon bagay nan eta nòmal li.

Non

Yon mo ou byen plizyè mo ansanm ki ede moun idantifye yon moun. Yon mo moun itilize pou fè yon lòt moun konnen yon bagay pa posib pou li reyalize, pou rive, pou regle e latriye. Yon repons negatif pou yon kesyon ki te merite yonn nan de repons sa yo: Non ou byen Wi.

Nòt

Nòt: Lajan papye. Yon moso papye ki fè konnen ke yon moun gen kòb li te prete yon lòt moun. Moun ki posede moso papye sa a kapab resevwa lajan kach pou li. Tèks yon moun ekri nan yon kaye ou byen nenpòt lide yon moun mete sou papye pou konsève li.

Nou

Yon pwonon ki ranplase yon yon gwoup moun. Plizyè moun ansanm. Moun ki di, Nou, rantre nan gwoup moun nan tou.

Nouri

Bay yon nenpòt èt vivan manje. Travay granmoun ki bay timoun, ti bebe manje paske yo pa kapab manje pou kont yo.

Nouris

Moman apre yon femèl fini pouse yon pitit mete deyò vant li e kantite tan li pran pou repran fòm li te genyen anvan gwosès la.

Nouriti

Nenpòt repa moun manje e ki bay enèji, gwosè, kwasans.

Nouvèl

Nouvèl: Yon emisyon nan radyo, televizyon ki pale de tout sa ki ap pase nan yon peyi, nan lemond. Enfòmasyon sou yon bagay, yon moun. Nouvèl Jenerasyon, Yon tip mizik ayisyen ki parèt nan ane katreven yo. Gwoup ki fè mizik sa yo chante an Kreyòl yon fason pou separe nouvo stil mizik yo a avèk ansyen mzik yo chantè te konnen chante nan lang Fransè.

Nouvo

Nenpòt bagay yon moun apèn konnen. Yon bagay yon moun rankontre, wè premye fwa. Yon bagay ki apèn fèt.

Novanm

Yonn nan kat mwa nan yon ane ki gen trant jou nan li e se li ki onzyèm mwa nan yon ane tou.

Nòvèj

Yon peyi sou kontinan Ewòp la ki sou kote Suèd.

Nwa

Yon koulè ki idantifye moun ki soti sou kontinan afriken an. Yon koulè ki sanble avèk koulè lannwit. Yon koulè ki kòmanse idantifye tout bagay ki negatif avèk eksperyans esklavaj la. Nwa te reprezante yon koulè gwo notab tankou wa yo, bondye nan antikite yo te konnen mete sou yo pou rad.

Nwasi

Fè yon bagay vini gen koulè nwa. Moman lè klate jounen an ap disparèt pou bay lannwit plas.

Nwaye

Eta yon bagay ki rete fè twòp tan anba dlo epi li toufe.

Nwèl

Nwèl: Selebrasyon jou nesans Jezi Kris ki tonbe jou vennsenk nan mwa Desanm chak ane. Se pi gwo fèt nan yon ane paske tout moun, nan tout klas, nan tout sosyete selebre li.

Nyaj

Yon gwo kantite lè moun sou tè a kapab gade nan lespas e ki sanble yo toujou ap deplase.

O

O: Kenzyèm lèt nan alfabèt lang Kreyòl la.

Obsede

Yon kantite kwayans yon moun genyen. Eta yon moun ki tèlman anvi yon bagay li kapab fè nenpòt bagay pou jwenn bagay sa a. Eta yon moun ki gen anpil pasyon pou yon bagay.

Òdinatè

Òdinatè: Yon machin, entelijan anpil, ki fè yon revolisyon nan fason moun kominike avèk lòt moun, avèk lòt machin e konsève tèks yo ekri. Gen anpil diferans nan òdinatè, men se de diferans ki pi enpòtan: Sèvitè avèk Pèsonèl. Malgre diferans sa yo, tout òdinatè gen senk pati sa yo: klavye, monitè, sourit, òdinatè a menm, avèk enprimè a. Moun rele tout senk pati sa yo òdinatè, men òdinatè a se kote ki resevwa kòmand klavye a avèk sourit la epi voye kòmand sa yo nan yon diskèt, yon enprimè ou byen nenpòt lòt machin byen lwen pandan li ap itilize yon liy telefòn. Machin sa pèmèt moun ekri nenpòt longè donkiman soti nan yon lèt pou rive nan plizyè milye fraz tankou yon liv. Yon moun ki itilize òdinatè pou ekri kapab mete nenpòt imaj nan tèks la e li kapab fè lèt yo nenpòt gwosè. Bagay yon moun ekri sou òdinatè kapab enprime sou papye ou byen konsève sou yon diskèt pou itilize yon lòt lè. Nenpòt tèks moun ekri sou òdinatè, machin nan kapab faks li, voye li sou fòm lèt-eletwonik bay yon lòt òdinatè, e latriye. Moun kapab itilize òdinatè nan plas televizyon, faks machin, aparèy telefòn, repondè telefòn e anpil lòt bagay toujou.

Oditè

Moun ki chita, rete pou koute diskou yon lòt moun. Anplwaye kontribisyon ki ap envestige jan moun kalkile enpo yo peye pou wè si moun sa yo byen kalkile sa yo peye a. Yon gwoup kontab ki sèlman revize travay lòt kontab pou wè si yo sib prensip kontablite nan travay yo.

Odyans

Yon gwoup moun ki ap koute yon moun ki ap fè yon diskou. Moun ki ap koute yon estasyon radyo. Moun ki ap gade yon estasyon televizyon.

Ofri

Lonje yon bagay bay yon moun san li pa mande bagay la. Pwomèt yon moun yon bagay, sèvis san li pa mande.

Òganizasyon

Plizyè moun ki reyini, ap travay ansanm, e yo ap chache menm bagay la pou tèt yo ou byen pou yon konpayi. Plizyè moun ki mete tèt ansanm pou pousib yon lide tankou yon lide biznis.

Ogmantasyon

Yon bagay ki vini an plis sou yon lòt bagay.

Ogmante

Mete yon bagay sou yon lòt pou fè li vini pi plis, pi gwo.

Okay

Pi gwo vil nan Depatman Sid la e se li ki kapital depatman sa a tou.

Òkèt

Òkèt: Yon kontraksyon nan gòj yon èt vivan ki anpeche lè soti pou moun nan respire nòmalman. Moun ki gen òkèt kapab santi yon ti sekous prèske chak dis segond konsa. Sa a se rezilta lè avèk bagay ki anpeche lè a sikile a. Anvan kèk moun mouri yo genyen yon òkèt ki kontinye a diminye pandan moun nan ap avanse pi pre lanmò a.

Oktòb

Oktòb: Dizyèm mwa nan yon ane. Gen tranteen jou nan mwa Oktòb la. Se mwa lekòl nan peyi Ayiti kòmanse ane lekòl la ki ap ale dire nèf mwa.

Okton

Yon anplwaye nan yon biwo lakomin yo ki responsab ouvri pòt biwo sa a chak jou travay, fè majistra konnen gen moun ki vini kote li e fèmen pòt biwo a apre jounen travay la.

Onbwèl

Parasòl. Yon bagay ki fèt avèk saten e tou won tankou moso yon boul moun itilize pou bare solèy, pare lapli. Dlo lapli a tonbe sou onbwèl la epi li sib fòm won a pou ale tonbe atè.

Ond

Tout espas vid ki egziste, yon kote gen anpil chanjman nitirèl ki ap fèt, men je moun pa kapab wè yo.

Ondiras

Yon peyi nan kontinan Amerik la kote moun yo pale Espanyòl. Ondiras se yonn nan peyi Amerik Santral la e kapital li se Tegisigalpa.

Onz

Dezyèm nonb pozitif ki gen de chif nan li apre dis. 11. Dis plis en. Sis plis senk. Douz mwens en.

Opalè

Opalè: Yon aparèy elektrik ki gen yon moso leman andedan yon woulo fil kouran ki kapab resevwa yon son de yon mikwo epi fè son an vini fò anpil.

Operasyon

Tout travay ki fèt pou bay yon rezilta. Kat mwayen aritmetik yo pou jwenn yon rezilta: adisyon (+), soustraksyon (-), miltiplikasyon (x) avèk divizyon (÷).