Diksyonè Kreyòl.

1 910 mo nan diksyonè a

Konsèy

Konsèy: Pawòl yon moun di yon lòt moun pou montre moun nan kisa ki pi bon pou li kapab fè. Moun nan pa oblije aksepte konsèy la, men moun ki nayif pran tout konsèy yon moun pou yon lòd.

Konseye

Pale avèk yon moun pou montre li sa ki pi bon pou li kapab fè. Bay yon moun konsèy.

Konsolasyon

Aksyon yon moun ki ap pale avèk yon lòt ki gen lapenn pou bay moun nan kouraj.

Konstitisyon

Manman tout lwa nan yon peyi. Tout bagay ki kontribye pou fè yon bagay sa li ye a. Tout sa ki fòme yon bagay. Dezyèm etap nan kontriksyon yon peyi sou kote drapo peyi a.

Konstriksyon

Tout etap yon konstriktè pase pou li konstwi yon bagay tankou yon kay, yon bato. Yon kay. Yon bato.

Konstriktè

Moun ki konnen ranje plizyè moso ansanm pou reyalize yon imaj nenpòt moun kapab konprann. Moun ki fè bagay tankou kay, bato, e latriye.

Konstwi

Ranje plizyè moso ansanm pou reyalize yon imaj nenpòt moun kapab gade e rekonèt kisa li ye. Moun ki ap fè bagay tankou kay, bato, e latriye.

Konsyans

Yon jij andedan tout moun ki fè moun nan santi li byen lè li fè yon bon bagay e ki fè moun nan santi li mal lè li fè yon move bagay. Konesans sou ki byen avèk sa ki mal.

Konsyantizasyon

Yon gwo mouvman edikasyon ki te kòmanse nan ane katreven yo nan peyi Ayiti pou fè ayisyen konprann kijan sistèm gouvènman peyi a move pou yo. Mouvman sa a grandi tèlman rapid li kontribye a kraze govènman peyi a nan epòk sa. Edike moun pou fè yo konprann lavi e rekonèt reyalite avèk ilizyon.

Kont

Nan yon pozisyon opoze a pozisyon yon lòt. Yon bagay ki pa twò piti e ki pa twò gwo. Egzateman kantite nesesè a. Yon lis debi avèk kredi pou montre sa ki soti e sa ki rantre nan yon konfrefò.

Kontab

Yon moun ki etidye syans kontablite a e ki pwatike kijan pou kenbe egzamine kont. Anpil moun panse kontab se yon moun ki manyen lajan, men sa pa vrè. Yon kontab fèt pou gen tout mwayen disponib pou esplike ki kòb ki rantre e ki lajan ki depanse menmsi li pa janm rankontre avèk kòb.

Kontablite

Teori e sistèm ki montre kijan pou ranje kont nan kòmansman yon biznis, kenbe kont yo, envestige kont yo epi rapòte sou yo.

Kontan

Ekspresyon satisfaksyon andedan yon moun ki parèt sou vizaj moun nan lè li ri.

Kontante

chache yon mwayen pou satisfè menmsi bagay ki pou bay satisfaksyon an pa vini.

Kontantman

Ekspresyon vizaj yon moun ki satisfè.

Konte

Mete anpil espwa sou yon bagay, yon moun. Soti nan yon nonb pi piti pou ale nan yon nonb pi wo.

Kontinan

Senk pati yo ki divize tout tè a: Ewòp, Azi, Afrik, Amerik, Oseyanik.

Kontinye

Ale san kanpe nan wout avèk yon bagay ki te kòmanse.

Kontra

Yon moso papye lalwa pèmèt de moun ou byen plis moun siyen pou yo respekte tout sa ki ekri sou papye a. Yon angajman de ou byen plizyè moun pran ansanm.

Kontraksyon

Yon fòs yon ti bebe ki andedan vant yon manman fè manman santi lè li bezwen soti e sa fè manman an konnen li ap ale akouche. Yon moman kote yon bagay ap chache wout pou soti epi yon lòt ap anpeche li soti; konsa yo bay kò yo ap aji sou li a yon doulè.

Kontrakte

Siyen yon kontra avèk yonn ou byen plizyè moun. Travay yon ti bebe ki fè yon manman santi li lè pou li akouche.

Kontre

Pase sou wout yon lòt moun te ap pase, men de moun yo te ap ale nan direksyon opoze.

Kontrekare

Kanpe an fas yon moun pou fè li konprann yon bagay li te fè pate bon pou wè si moun nan te kapab evite fè bagay sa a yon lòt fwa. Yon moun ki kontrekare yon moun kapab rankontre yon reyaksyon vyolan nan men lòt moun nan.

Kontribisyon

Aksyon moun ki mete yon pati nan yon bagay anpil lòt moun, yo chak, ap mete yon pati tou. Patisipasyon nan yon bagay pou fè li vini konplè. Yon biwo leta ki kolekte enpo tout sitwayen avèk biznis nan peyi a peye.

Kontribye

Bay patisipasyon nan yon bagay pou fè li vini konplè. Mete yon pati nan yon bagay anpil lòt moun ap mete pa yo nan li tou.

Kontwòl

Kontwòl: Pouvwa yon moun gen pou kontwole, pou aplike lwa. Yon òdinatè ki ap kòmande yo lòt machin.

Kontwole

Fè respekte, aplike lwa. Pase lòd a tout moun ki anba kontwòl.

Konvansyon

Yon antant ant tout syantis pou ede yo jwenn solisyon yon pwoblèm. Yon moman kote anpil moun ki gen konesans nan yon bagay rankontre pou jwenn solisyon yon pwoblèm pandan yon ap koute opinyon chak moun ki pale.

Konyen

Travay yon gason, yon mal bèt ki rantre zozo li nan koko yon fi, yon femèl avèk anpil fòs.

Kopye

Kreye imaj yon bagay yon fason pou li difisil pou moun konnen kiyès ki orijinal la e kiyès ki kopi a. Gade jan yon moun fè yon bagay pou fè bagay la menm jan tou.

Koresponn

Konparezon ant de fòs pou wè kiyès ki pi fò. Aksyon yon moun ki reponn atak yon lòt.

Koridò

Koridò: Yon ti wout ki jennen anpil kote plis pase yon moun pa kapab pase yonn sou kote lòt la.

Kòt

Kòt: Plizyè zo nan kò tout vètebre ki fòme do yo epi ki antoure kè yo. Se zo sa yo moun touche lè yo manyen anba tete yo.

Kote

Yon plas pou jwenn yon bagay. Yon kwen.

Kotri

Yon fi ki aksepte plase avèk mari yon lòt fi.

Kou

Pati ki lye tèt yon moun avèk epòl moun nan. Frape yon bagay sou yon lòt bagay.

Koubèland

Yon magouy kèk moun fè pou rantre kouran andedan kay yo san peye pou li. Yon moso bagay ki fèt avèk menm materyèl avèk kawotchou.

Kouch

Anpil nan yon bagay ki parèt san moun pate ap espere li. Kantite kras ki sou kò yon moun.

Kouche

Pran yon pozisyon vètikal tankou yon matla sou yon kabann. Kouche fi, Mete yon fi sou kabann epi rantre zozo andedan koko li. Eta solèy lè li sispann klere tè a.

Kouchèt

Yon moso twal moun mete nan fant janb yo pou pare likid tankou pipi, poupou. Yon moso twal pou mete nan fant janb ti bebe paske ti bebe pa kapab kenbe pipi avèk poupou pou lage yo lè li vle.

Koud

Kole plizyè moso twal ansanm avèk fil ki pase andedan moso twal yo avèk yon egiy.

Koudeta

Aksyon kèk moun nan yon peyi ki touye prezidan peyi ou byen mete li nan avyon epi voye li ale nan yon lòt peyi pou yo pran plas prezidan an. Kèk lè sivil konnen pran pouvwa prezidan an tou, men se militè ki gen plis mwayen pou bay koudeta. Nan moman yon koudeta moun nan peyi a pa konnen ki moun ki ap gouvène anvan nouvo prezidan an pale avèk pèp la. Detoúnman politik yon peyi.

Koukouy

Yon ti ensèk ki kapab vole e ki gen limyè limen nan dèyè li lè li fè nwa.

Koule

Travay yon moun ki rantre nan dlo san kite pyès pati nan kò li deyò. Eta yon resipyan ki gen yon tou nan li ki anpeche li kenbe likid san likid la pa tonbe.

Koulèv

Koulèv: Yon bèt long, kò glise e ki mache pandan li ap trennen sou vant li. Gen plizyè diferan koulèv. Gen koulèv ki kapab peze 400 liv.

Kounouk

Yon ti kay moun ranje kò yo malman pou viv andedan.

Kous

Aksyon de moun, de bèt ou byen plizyè ki ap kouri pou wè kiyès ki ap rive yon kote anvan.

Kout

Pase dwa bay yon moun pou li kontinye yon bagay. Yon moun ki pa gen wotè nòmal yon moun genyen. Yon moun ki gen mwens ke senk pye pou wotè.

Koute

Tande yon bagay, yon moun ki ap pale epi bay moun sa a anpil atansyon pou konprann sa li ap di a.

Kouti

Yon pati nan yon bagay ki koud. Travay yon koutiryè, yon tayè lè li kole de moso twal ansanm.